FTERRA NË VITET 1913 – 1916

Pa u konsoliduar shteti i porsa formuar më 28 Nëntor 1912 në Vlorë, filloi Lufta Ballkanike, e cila preku drejtpërdrejt edhe fshatin tonë. Në maj të vitit 1913 ushtarë grekë erdhën deri në Fterrë dhe si shprehje e dhunës e urrjetjes ndaj vendasve ishte dhe vrasja e disa bashkëfshatarëve. Mbi këto ngjarje të hidhura dëshmon një letër e popullit të Fterrës drejtuar Minidtrisë së Brendshme të Qeverisë së Përkohëshme të Vlorës.
Gjendja e krijuar i detyroi fteriotët të mërgonin ku të mundnin. Shumë shkuan në fshatrat e Lumit të Vlorës dhe dimri i vitit 1913-1914 i zuri pa shtëpi e pa katandi, ndaj ka qënë një nga periudhat më të vëështira.
Në pranverë të vitit 1914 burrat e fshatit u ngritën me armë, u organizuan në çetë dhe me ndihmën e çetës së Vlorës të udhehequr nga Sali Murati nga Vranishti, arritën të përzënë ushtarët grekë nga vatani. Në luftë kundër ushtarëve grekë për trimëri e qëndresë burrërore u shqua Emine Zhupa, për të cilën ka shkruar shtypi i kohës. Gjithashtu, në këto përpjekje u plagos dhe Nuredin Kofina.
Zhvillimi i mëvonshëm i ngjarjeve politike e ushtarake favorizuan ripushtimin e fshatit nga ushtritë greke. Ky keqësim i gjendjes detyroi bashkëfshatarët që të dërgonin një delegacion në Delvinë për të shprehur protestat e tyre kundër bandave vorio-epirote. Kurse shumica e banorëve u detyruan të lënë përsëri shtëpitë e tyre e të mërgonin në fshatrat e Vlorës. Kjo gjendje vazhdoi deri në vitin 1916, kur ushtarët grekë u detyruan të largohen përgjithmonë nga fshati ynë.
Fteriotët u kthyen përsëri në fshatin e tyre me shtëpi të djeguara e të shkatërruara, me pemë e ara të shkretuara dhe me fare pak gjë të gjallë që kishte mbetur nga këto vite të vështira. Ne vjeshtën e parë të gjashtëmbëdhjetës, me punë e djersë fshati u përtëri në të gjitha fushat e jetës. Në këtë vit hapet shkolla fillore në gjuhën shqipe, dritarja e dijes për të gjithë brezat e ardhshëm të fshatit.

Prof.Dr. Muzafer KORKUTI
Nr.4 – tetor, 1997

Enter supporting content here